काफ्ले थरको इतिहास
काफ्ले थरको वंशपरम्परा प्राचीन शाण्डिल्य गोत्रसँग जोडिएको मानिन्छ। शाण्डिल्य गोत्रका ब्राह्मणहरू प्राचीन समयमा कन्नौज क्षेत्रमा बसोबास गर्दै आएको र मध्यकालमा कन्नौजमा भएको आक्रमणपछि आफ्नो धर्म तथा संस्कृति जोगाउँदै महाकाली पार गरी नेपालको भूभागमा प्रवेश गरेको वंशपरम्परामा उल्लेख छ।
नेपाल प्रवेशपछि शाण्डिल्य गोत्री ब्राह्मणहरू तत्कालीन सिंजा राज्य हुँदै बझाङ क्षेत्रमा पुगेको मानिन्छ। त्यहाँ काफलका वनजंगल भएको डाँडामा बसोबास गरी खेतीपाती गर्दै उनीहरूले आफ्नो बस्ती विस्तार गरे। यही काफलको डाँडासँग जोडिएको बसोबासका कारण कालान्तरमा उनीहरूलाई “काफल डाँडाका” भनेर चिनिन थालेको र यही सम्बोधन क्रमशः परिवर्तन हुँदै “काफ्ले” थरको विकास भएको मानिन्छ।
बझाङ क्षेत्रमा काफलसेरी, शाण्डिल कोट र शाण्डेली त्रिवेणी जस्ता स्थाननामहरू पनि यस वंशको प्राचीन बसोबाससँग जोडिएको परम्परा पाइन्छ।
समयक्रममा बझाङबाट काफ्ले परिवारहरू जुम्ला, दैलेख, काठमाडौं हुँदै नेपालका विभिन्न भूभागमा फैलिँदै गए। आज काफ्ले थरका परिवारहरू नेपालको पूर्वदेखि पश्चिमसम्म विभिन्न स्थानमा बसोबास गर्दै आएका छन्।
